Y Papur Gwyrdd

Bu’n ysbrydoliaeth gweld sut mae David Attenborough (93) a Greta Thunberg (16) wedi  cyd-lefaru ar draws y cenedlaethau yn ddiweddar wrth alw am weithredu argyfyngus-o-gyflym i geisio ffrwyno cynhesu byd-eang.

Cafodd David Attenborough sylw eang wrth iddo esbonio’i bryderon ynghylch y difrod rydym yn ei wneud i’r Ddaear i Bwyllgor Strategeg Busnes, Ynni a Diwydiant San Steffan ddoe (Gorffennaf 11).

Greta Thunberg – y ferch ysgol o Sweden ysbrydolodd fudiad ieuenctid byd eang i warchod ein planed. Llun: Wiki Commons filmsforaction.org

Dywedodd y darlledwr dylanwadol wrth yr Aelodau Seneddol: “Dydyn ni ddim yn gallu bod yn ddigon radical wrth ddelio â’r materion hyn … Rwy’n dyfalu ein bod ar hyn o bryd ar ddechrau newid mawr. Pobl ifanc sydd wedi hybu hynny.”

Ac yn wir, mae pennaeth OPEC – llais y cynhyrchwyr olew byd-eang – wedi cydnabod yn gyhoeddus nawr bod y mudiad ieuenctid rhyngwladol a sbardunwyd gan y ferch ysgol Greta Thunberg o Sweden wedi llwyddo i siglo’r corfforaethau ynni ffosil.

Wedi cyfarfod yn Vienna, dywedir bod Mohammed Barkindo, Ysgrifennydd Cyffredinol OPEC, wedi datgelu bod plant hyd yn oed rhai o swyddogion pencadlys OPEC “yn holi am eu dyfodol … [wrth weld] eu cyfoedion ar y strydoedd yn ymgyrchu yn erbyn y diwydiant hwn.”

Er yn mynnu bod y feirniadaeth o’r diwydiant olew yn ‘anwyddonol’, esboniodd Barkindo bod cyd-ymgyrchu eang a threfnus y plant ysgol yn erbyn olew “yn dechrau … llywio polisïau a phenderfyniadau corfforaethol, gan gynnwys buddsoddi yn y diwydiant …  [a dyma, efallai] y bygythiad mwyaf i’r diwydiant wrth symud ymlaen.”

Da gennym lawenhau gyda Greta bod y llosgwyr tanwyddau ffosil yn gwegian ychydig yn wyneb cryfder mudiad ‘Dyddiau Gwener dros y Dyfodol’. Dyma’r mudiad sydd wedi gweld miloedd o blant ledled y byd yn cynnal streiciau o’u dosbarthiadau o blaid gwarchod y Ddaear, gan gynnwys rhai yng Nghymru.

Wrth ymateb i sylwadau pennaeth OPEC, meddai Greta ar Drydar, “Diolch! Y ganmoliaeth fwyaf eto i ni!”

Diolch byth bod cymaint o bobl ifanc wedi ymateb i her Greta. Ond mae angen llawer mwy ohonom ymhlith y bobl hŷn i ymateb yn yr un modd i her David Attenborough. Wedi’r cyfan, ni sydd wedi achosi’r llanastr.

Yn achos gwarchod ein Daear – yr Ifanc a Ŵyr, yr Hen a dybia!

Llongyfarchion mawr i bobl ifanc ymhell ac agos am gymryd rhan mewn ton o brotestiadau amgylcheddol ledled y byd ar hyn o bryd. Galw maen nhw ar lywodraethau i weithredu o ddifrif i gwtogi ar gynhesu byd-eang ac i amddiffyn systemau naturiol.

Gwych clywed bod cannoedd o ddisgyblion yma yng Nghymru wedi ymuno a’r protestiadau heddiw gan adael eu hysgolion er mwyn cynnal protesiadau gan gynnwys un o flaen Senedd Cymru yng Nghaerdydd.  Buont yn lleisio’u hofnau yn ddi-flewyn ar dafod am y niwed sy’n cael ei achosi i systemau naturiol y blaned.

Hen, hen bryd bod ein gwleidyddion yn cael gwersi gan bobl ifainc am ddifrifoldeb y bygythiad i’r Ddaear. Dyma’r pwnc ddylai fod yn gyd-destun i bob pwnc arall sy’n cael sylw’r gwleidyddion ond sy’n cael ei anwybyddu’n rhy aml.

Deallwn fod 10,000 o blant o ryw 60 ysgol wedi gweithredu heddiw trwy’r Deyrnas Gyfunol gan gerdded allan o’u dosbarthiadau i ddangos maint eu pryderon .

Dechreuodd protestiadau’r bobl ifainc yn Sweden trwy arweiniad arloesol Greta Thunberg, 15 oed. Protestiodd Greta ar ei phen ei hun o flaen Senedd y wlad honno ym mis Awst gan roi cychwyn i’r ymgyrch holl-bwysig hwn.

Erbyn hyn mae tua 70,000 o blant yn cynnal protestiadau rheolaidd mewn 270 o ddinasoedd ledled y byd.

Da iawn bod pobl ifanc nawr yn dechrau arwain yr ymgyrch i warchod ein cartref planedol. Mynnwn fod ein gwleidyddion yn gwrando arnynt ac yn gweithredu ar frys ar Gytundeb Newid Hinsawdd Paris 2015.

Gadawn i’n gwleidyddion wybod ein bod yn sefyll yn gadarn gyda’r plant a’r bobl ifainc ardderchog hyn ac yn eu cefnogi’n llwyr. Diolch yn fawr iddyn nhw!